Амударё тумани Қорақалпоғистон Республикасининг жанубий-шарқида, Амударёнинг ўрта оқимида жойлашган. Туман худудининг асосий қисми Амударёнинг чап қирғогида жойлашган бўлиб, ўнг қирғокда жойлашган худуд билан Қипчоқ ва Жумуртовдаги пантон кўприк орқали боғланган. Жанубий-ғарб томондан Туркманистон Республикаси Дашогуз вилояти Губатаг тумани, шарқ томондан Хоразм вилояти Гурлан тумани билан, шимоли-шарқ томондан Қорақалпоғистон Республикаси Беруний ва Қораўзак туманлари билан чегарадош. Ўзбекистон Республикаси Олий Кенгаши Раёсатининг Фармонига асосан 1957 йилнинг декабрида ташкил этилган. Туман худудидан вилоят қарамоғида бўлган Манғит-Урганч, Нукус-Манғит-Тўрткўл, Манғит-Дашогуз ва Манғит-Губатағ йўллари ўтган. Шунингдек туман ҳудудидан умумий узунлиги 39, 7 км бўлган Нукус-Тўрткўл йўналишидаги темир йўл ўтган. Туман худуди: 1021 кв.км. 2015 йил 1 январ ҳолатига аҳолиси сони 182,3 минг кишини ташкил этади. Шундан 48,4 минг киши шаҳарда, 133,9 минг киши қишлоқда яшайди. Туманнинг маъмурий маркази, аҳолиси 48,4 минг киши бўлган, 1973 йилда шаҳар типидаги поселкадан туман қарамоғидаги шаҳарга айлантирилган Манғит шаҳридир. Туман худудидан Нукус-Тўрткўл темир йўл шаҳобчаси ўтган. Туманда битта туман қарамоғидаги шаҳар, 30 та маҳалла, Жумуртов посёлкаси, 3 та шаҳарча типидаги посёлка ва 16 та овул фуқаролар йиғинлари бор.
