Hech kimsa dardiga topmaydi chora, Qorani oq derlar, oqnichi qora, Ro'zg'or bu g'or ekan, teshik tog'ora, Odam bilan odam ishi yo'q qarang, Hamma o'zi bilan o'zi ovora. Qarang, fasllarda bir rang qolmadi, Qarang, muhabbatda ohang qolmadi, Inson ko'nglida yo'q nayrang qolmadi, Bosh qashib mulla va qozi ovora, Hamma o'zi bilan o'zi ovora. Baxtini yo'qotgan armondan nolir, Nishon topmagan yoy kamondan nolir, Noshukur tunu kun zamondan nolir, Karvonda ot va it izi ovora, Hamma o'zi bilan o'zi ovora. Hech kimsa qo'l cho'zmas sening g'aming yeb, Tirikmisan yoki o'likmisan deb, Bir guli ochilsa o'ntasi so'lib, Qarang, shoir bilan so'zi ovora, Hamma o'zi bilan o'zi ovora. Boy ota kambag'al to'yiga boqmas, Yomon ot orqada toyiga biqmas, Nodon cho'pon qishda qo'yiga boqmas, Suruvda cho'pon va qo'zi ovora, Hamma o'zi bilan o'zi ovora. O'g'rilar kelishmas to'g'rilar bilan, To'g'rilar qiziqmas o'g'rilar bilan, Otaning ishi yo'q o'g'illar bilan, Qarang, ona bilan qizi ovora, Hamma o'zi bilan o'zi ovora. Hech kimsa dardiga topmaydi chora, Qorani oq derlar, oqnichi qora, Ro'zg'or bu g'or ekan, teshik tog'ora, Odam bilan odam ishi yo'q qarang, Hamma o'zi bilan o'zi ovora.
