Hamma sizga mehr ila boqmasa ham, Ariq suvi daryodayin oqmasa ham, Kaminaning latifasi yoqmasa ham, Ko’ngil uchun kulib qo’ying, ko’ngil uchun. Topgan gul keltirar topmagan bog’ piyoz, Sovg’amiz ham yoqmaganda sizga biroz, Ko’nglimizdan yana yagona iltimos, Ko’ngil uchun olib qo’ying, ko’ngil uchun. Do’stingiz boshiga taqdir kulfat solsa, Qo’shningizga bir bor berib, ming bor olsa, Dushmaningiz tasodifan o’lib qolsa, Ko’ngil uchun yig’lab qo’ying, ko’ngil uchun. Mehmon tinmay ortingizdan quvib yursa, Uyingizni uyidayin yaxshi ko’rsa, Har kun darvozangiz taq-tuq qilib tursa, Ko’ngil uchun ochib qo’ying, ko’ngil uchun. O’zgalarning quvonchiga joningni ber, Yaxshi ishlar qilib, mayli qaddingni ker, Siz uchun bu dilozorlar, yozilgan she’r, Ko’ngil uchun o’qib qo’ying, ko’ngil uchun…