Goho sizning borligingiz unutdim,
Yo'llarimda zorligingiz unutdim,
Umidlari kesilgan bu dunyoda,
Yolg'iz umidvorligingiz unutdim.
Oshna topdim va lekin do'st topmadim,
Oq ko'ngilli bir qaro ko'z topmadim,
Shamollarga sovurdim gul so'zlarni,
Lekin sizga bir shirin so'z topmadim.
Vaqtlar o'tib sochga qirov qo'narkan,
Sevgi otashlari asta so'narkan,
Barcha tuyg'u aldamchi va o'tkinchi,
Ona mehri yolg'iz sobiq qolarkan.
Hoki poyingizni ko'zimga suray,
O'zim yorug' ko'nglingizni to'ldiray,
Bir chekkaga surib qo'yib dunyoni,
O'g'il bo'lib yoningizda o'tiray.