__Мансабу бойлик эмас, дўст йиққан подшо экан, ___Давлатинг ортганида душман ҳам ошно экан, ___Дил мулки бир кошона, ҳикмати дунё экан, ___Дунё ишин ўйламанг пишмаган савдо экан, ___Йўқчилик эмас дўстлар, тўқчилик ғавғо экан. ___Ғаниминг кўп бўлса гар, отгани тош излама, ___Ғамларинг кўп бўлса ҳам тўккани ёш излама, ___Ҳалол риз-қингни қўйиб, ортиқча ош излама, ___Қайда баднафс кўп бўлса, шайтон ҳам шайдо экан, ___Йўқчилик эмас дўстлар, тўқчилик ғавғо экан. ___Бахтга тўлиб юрганинг кўролмайди баъзилар, ___Нафас олмай ҳасадсиз туролмайди баъзилар, ___Нечун ҳақиқатга тик қаролмайди баъзилар, ___Номарднинг кўзлари кўр, юзлари қаро экан, ___Йўқчилик эмас дўстлар, тўқчилик ғавғо экан. ___Йўқчиликда бир бурда нонга ҳам кўнар инсон, ___Йўқчиликда сабр этиб ҳар дардга чидар инсон, ___Тўқчиликда бойлик деб, балчиққа ботар инсон, ___Тўқчиликда ортингдан топганинг иғво экан, ___Йўқчилик эмас дўстлар, тўқчилик ғавғо экан. ___Эҳ, бу тирикчилик деб қанча йўлларни юрдим, ___Эҳ, бу йигитчилик деб қанча кунларни кўрдим, ___Қисмат, шерикчилик деб қанча йилларни бердим, ___Дили борда дунё бор, пули бор гадо экан, ___Йўқчилик эмас дўстлар, тўқчилик ғавғо экан.
