Inson ruhiyati juda murakkab, hozirgina hayotdan mamnun bo‘lib turgan do‘stingiz biron noxush xabarni eshitgan zahoti darhol g‘azab otiga minib olishi mumkin. Yoki doimo xushnud kayfiyatda yuradigan yaqiningizga hazil qilsangiz, u hazilingizni tushunmay sizdan xafa bo‘lib qolishi ham mumkin. Shu o‘rinda savol tug‘iladi, nahotki ko‘p yillardan buyon do‘stimning fe’l-atvorini tushunib olmagan bo‘lsam?! Bu borada ruhshunoslar insonlarning ichki dunyosini o‘rganish borasida ko‘plab tadqiqotlar olib borganlar. Quyida mutaxassislarning tadqiqotlariga tayangan holda yozuv orqali xarakterni aniqlash to‘g‘risidagi ma’lumotlarni taqdim etamiz.
E’tibor bergan bo‘lsangiz ba’zi insonlar katta harflarda, ba’zilar aksincha kichik harflarda yozishadi, ayrimlar bo‘lsa bosma harflarda yozishga odatlanishgan. Demak, ma’lumotlarimizni o‘qib, yaqinlaringizning fe’l-atvorini yanada yaxshiroq bilib olishingiz mumkin.
So‘zlar orasida bo‘sh kataklar ko‘p bo‘lsa – bunday yozuv sohib yoki sohibasi o‘zini yolg‘iz his qilyapti. U yaqin do‘stga, sirdosh insonga muhtoj. Bunday insonlardan sadoqatli do‘st chiqadi.
Tartibsiz yozadiganlar - turmushini u qadar yaxshi nazorat qila olmaslikni bildiradi. Ular doimo yaqinlarining qo‘llab- quvvatlanishlariga muhtoj bo‘lishadi. Shu bilan birga ular kuchli iqtidor egasi hamdirlar.
Katta harflarda yozadiganlar - birozgina tartibsiz, jahldorroq, lekin yaqin kishilarini ko‘z qorachig‘idek asrashadi. Ko‘ngilsizliklarni tezda unutib yuboradilar.
Juda kichik harf ("chumoli”) - o‘ziga ishonchi past inson, ehtiyotkor, realist, texnika bilan tez til topishadigan insonlardir.
Uzun harflar - estetika, mardlik, qobiliyatdan dalolat beradi. Shuningdek, bunday yozuv egalari adabiyotga mehr qo‘ygan kishilardir.
Semiz harflar – ochiqlikni bildiradi.
Raqamlarga o‘xshash harflar - o‘qimishli, sabrli va biroz sovuqqonlikning belgisi.
Qog‘ozga siyoh ko‘p tomizilgan , surkalgan joylar ko‘p bo‘lsa - bundaylar noziktabiat, kutilmagan, ajoyib ishlarni bajarishga moyil.
Harfdagi belgilarni tashlab yozish - yolg‘iz qolib, o‘ziga xizmat ko‘rsatolmaydi, o‘ziga nisbatan bee’tibor.
Ilgaklarni gajak bilan yozish - qarorni oson va tez qabul qiladilar. Nazoratni yaxshi ko‘radilar, qonunlarga bajonidil amal qiladilar. Shuningdek, ular optimist bo‘ladilar.
Ilgakni uzun tushurish - zavq-shavqni bildiradi.
Ilmoq uchlari o‘tkir - haqqoniylik va ochiqlik.
Xattotlar xatiga o‘xshash - fantaziya kuchliligi, qobiliyatlilikdan dalolat. Qo‘rqoqlik va beqarorlikni ham bildiradi.
Bezaklarsiz , oddiy, so‘zlar orasida bo‘sh kataklar hammasida bir xil tashlangan bo‘lsa, harflarning shakli ham deyarli bir xilligi - aql ustuvorligidan dalolat.
Harflar bir-biri bilan bog‘langan , qo‘lcha hosil qilgan bo‘lsa - o‘z fikrini hurmat qilishdan dalolat.
Yengil, ortiqcha kuch va harakatsiz yozuv - xarakteri ham yengil, hayotdan rozi, birovga quloq tutuvchi va ergashuvchi, mehribon.
Kerakmas paytda, masalan so‘z o‘rtasidagi harflarni ham kattada yozish, ko‘p joy tashlash - quvnoq, hazillarni yoqtiradigan, sevgi va orzuga moyil, shuningdek, matematik qobiliyatga ega.
O‘ng tomonga og‘ishtirib yozish - faol va orzularga boy.
O‘ng tomonga juda ham ko‘p egilgan, natijada oxirgi harflar deyarli ko‘rinmay qolgan, bir qarashda titrab yozilganga o‘xshasa – ta’sirchanlik, titrab yozish - talabchan, go‘zallikka mehri baland, dangal, ayni vaqtda qo‘rqoq.
To‘g‘ri qilib yozadiganlar - xarakterida qo‘rquv yo‘q.
Yozuv aniq, o‘qishga oson, harflar bir- biriga bog‘langan bo‘lsa - bu mehnatkash, ishlarni chin dildan qilish, ba’zida pessimist, bunday odamlar gohida ochiq gapirib, qo‘pollik ham qilib qo‘yadilar.
Chap tomonga og‘ishtirib yozish - erkin emaslik, doimiy xarakteri yo‘q, aniq qadamni qo‘ya olmaydi. Lekin bunday odamlar juda mehribon bo‘lib, ulardan sadoqatli do‘st chiqadi.
Kichik qog'ozga ko‘p narsa sig‘dirish (tejamkor usul) - buning iqtisodga daxli yo‘q. Aynan shunday yozadiganlarga o‘zboshimchalik yot bo‘ladi.
Harflarni qisqartirish , qator ohiridagi so‘z yoki harflarni pastga tushib ketish - o‘rta bo‘ylilarga xos. Oq-sariqdan kelgan, malla sochlilarning yozuvi aniq, did bilan yozilgan bo‘ladi.
Harf va so‘zlari mayda, cho‘zilmagan. Qator chizilmagan varaqqa ham tekis yozadi. Bundaylarning ko‘pchiligining husnixati chiroyli bo'ladi.
Qora sochlilar ulardan farqli ravishda qator chizilmagan joyda tepaga chiqib ketadi. Uning husnixatida chiroyli yozishga urinishlar sezilib turadi. U bosh harflarni bilintirib yozadi, ba’zan keraksiz joyda ham bosh harfni ishlatadi.
Davlat ishida ishlovchi kishilar harflar formasiga e’tiborsiz yozishadi. Aksincha yozadiganlar esa ko‘pincha ishchi, hunarmand, xizmatchilarga tegishli bo‘ladi.
Qator chizilmagan qog‘ozga yozganda pastga tushib ketish shoirlarga xos.
Grafologiyada kuzatilgan yana bir holat: tikuvchining husnixati chiroyli bo‘ladi.