Saytni Yuklab bo'lmadi
Суриялик исёнчилар Россияга “Иккинчи Афғонистон”ни ваъда қилмоқда, деб хабар беради Reuters агентлиги. Агентлик билан ҳамсуҳбат бўлган мухолиф кучларнинг таъкидлашича, “Россия бу ерга юборган аскарларини тобутларда қайтиб олади”.
Агентлик Башар Асад режими ҳамда ИШИДга қарши курашаётган суриялик исёнчилар сафларида сўровнома ўтказди. Уларнинг маълум қилишича, ҳукумат қўшинлари сезиларли даражада кучайган: авиазарбалар аниқлашган, жанг майдонларида янги зирҳли техника пайдо бўлган.
“Ҳисоб-китобларимизга қараганда, русларнинг иштироки туфайли жанглар яна бир неча йилга чўзилади”, - деди қуролли гуруҳлардан бирининг бошлиғи сўров чоғида. Ихтилофнинг бошқа иштирокчилари Туркия ва Саудия Арабистонининг ҳам фаоллашувини кутмоқда.
“Россия ихтилофни сиёсий йўл билан ҳал қилишдан манфаатдор эмас, - деди “Озод Сурия армияси” вакили. – У фақат Асад режимини сақлаб қолишга интилмоқда. Бизни қўллаб-қувватлаётган давлатларга келсак, ўйлашимча, улар бизга моддий ва сиёсий жиҳатдан ёрдам беради”.
Расмий Москва Башар Асадни мамлакатнинг ҳақиқий раҳбари деб ҳисоблашини бир неча бор эътироф этган эди. Аммо Россия қуролли кучларининг ҳарбий ҳаракатларда иштирок этиши хусусида ҳозирча ҳеч қандай расмий маълумот мавжуд эмас.