Ёшингиз 35 га тўлганида ва кейин ҳам барча дўстларингиз ҳамда яқинларингиз қийин дамларда сизни тинчлантиришга уринишади, йиллар ўтган сайин сабр-бардошингиз ҳам оша боради. Ҳа, яқинларим тўғри айтишар экан, инсоннинг ёши ўтаверса, чидамли бўлишни ўрганаркан.

Кутишни билмаганимиз учун ҳаётда қанча муаммоларга дуч келамиз-а! Сабрсизлик… Раҳбарингиз сизга нотўғри баҳо берганида, жаҳл қилманг. Дўконда ёки транспортда қўпол муомала қилишганда сиз ҳам уларга дарров жавоб қайтарманг. Сизга қизиқиш  билдирмаётган эркак ёки аёлга қўнғироқ қилманг. Жанжалдан бир соат ўтар-ўтмас айб ўзидан ўтган севганингиздан кечирим сўраманг. Бесабаб овозини баландлаган эрингизга бақириб берманг. Бу рўйхатни ҳали узоқ давом эттириш мумкин. Чунки биз ёш эканмиз, ҳис-туйғуларимиз бежилов, оловдекмиз… Ўзимизни ҳеч аямаймиз, ўз-ўзимизга муҳаббатни кам туямиз.

Ёшинг анча катта бўлгач, ҳатто жаҳлингни тезда чиқара оладиган киши ҳам “Сабр-тоқатингга қойилман!” деб қолади. Мана шунда хафа бўлишни ҳам, хурсанд бўлишни ҳам билмай қоласан. Чунки, оғир-вазминлик аниқки, ёшликнинг белгиси эмас, бироқ бошқа томондан ўзингни бошқара олишингни сезиб қувониб кетасан киши. Энди ўзини тута билиш шунчаки қуруқ сўз эмаслигини, буни қила олишингни биласан.

Сизнинг ҳаётингизда ҳам мана бундай ҳолатлар бўлган бўлса керак… Битта дарғазаб хабар ёзасиз, кетидан яна саккизтасини ёзиб, ҳаммасини ётиғи билан тушинтиришни истайсиз. Телефон орқали яқинингиз билан жанжаллашиб қолдингиз – ичингизда кимдир яна қўнғироқ қилиб, охиригача гаплашиб ол дейди ва сиз рақамингизни блоклаб қўймагунларича қайта ва қайта қўнғироқ қилаверасиз. Яқинингиз сизга эшигини очмаяпти – сиз бўлса, милицияни чақирмагунларича эшик тугмачасини босаверасиз, босаверасиз. Битта электрон хайрлашув номасини ёздингиз, яна учта шундай номалар, икки кундан сўнг эса, битта ярашув номаси. Эрингиз билан ажрашишга қарор қилдингиз, ажрашиш аризасини кўрсатиб эрингизга жаҳл қилдингиз, эртаси кун эса ундан этик учун пул сўрадингиз. Раҳбарингиз эшигини қаттиқ ёпиб чиқиб кетиб, ярим соатдан сўнг ишдан бўшаш тўғрисидаги аризани олиб келдингиз. Кечаси билан йиғлаб, эртаси кун эрталаб соҳангизга мос келмайдиган ишда ишлашга рози бўлдингиз. Ўзимизни бу тарзда тутиб, эришган барча ютуқларимизни бир ҳаракат билан йўққа чиқарган ҳисобланамиз. Ўз ҳурматимизни ўзимиз йўқотиб, ўзини боса олмайдиган, енгил табиатли шахс сифатида намоён бўламиз. Агар шунда тўхтаганимизда эди…

Юрагимиз ҳапқириб ураётганида туйғуларимизни жиловлаш жуда қийин. Буни қила оладиганлар юқори тоифадагилардир. Керак вақти ўзига шунчаки “Тўхта” дея оладиган инсон, ҳар қандай жангни ва ҳар қандай қийинчиликни енга олади. Нима сизга ёрдам беришини, чалғита олишини ўзингиз биласиз. Балки 10 гача, балки 100 гача санарсиз, балки 365 ни 247 га хаёлан кўпайтирарсиз, балки атрофингиздаги барча қизил предметларни санарсиз. Ванна қабул қилиб чиқиш ҳам ёмон фикр бўлмайди. Кўчага чиқиб маҳаллангизни 15 марта айланиб чиқарсиз. Хуллас, кайфиятингизни яхши томонга ўзгартириб, ёмон хаёллардан қутилишнинг юзлаб йўллари бор. У сизга кайфиятга қайтишга ёрдам беради – ўз қадрини билиш кайфиятига. 

Ҳаётда шундай пайт келадики, сеники бўлиши керак бўлганлар сендалигини тушиниб етасан.Ва улар билан қалбинга хотиржамлик кириб келганини ҳис қиласан. Энг тўғри танлов, айни вақтда тақдир йўлингда учраганидан анча олисда бўлганини яққол англай бошлайсан. Агар йиғлагинг келса, аввал йиғлаб, хабар ва хатларни эртаси куни эрталаб жўнатишни ўйлайсан (агар тонгёришар пайт сенинг ҳам қалбингда ёруғлик нур сочмаса). Ҳали 35 дан сўнг 36, 37 ёшинг келади… Ҳаёт тўхтаб қолмайди: ўзингизга мос эркакни ёки аёлни учратасиз, болаларингиз туғилади, ишингиз ҳам кўнглингиздагидек бўлади.

Кутишни билиш бахтли бўлишнинг асосий сири эмасдир балки. Тўғри келган биринчи вариантни эмас, балки доим орзу қиладиганингизни амалга ошириш, ақлингизга келган биринчи ишни қилиб, афсус чекмасдан, нишонга уриб, аниқ гапириш ва ўзингизни тута олганингиздан завқ олишингиз. Мана шу йўл билан мақсадга эришиш мумкин. Чунки тўғри қарор – бу шундай таомки, у доим совуқ ҳолда тортилиши лозим.

Сиз қарши фикр билдиришингиз мумкин: “Агар ҳис-туйғуларингизни доим жиловласангиз, ҳис-туйғу интеллектига нима бўлади?” Йўқ, жараёнда сиз ҳис-туйғуларингизни жиловламайсиз, балки уларни англаб бошқарасиз ва ўз-ўзидан фикрлашингизга ёрдам берасиз. Жаҳл билан қабул қилинган қарорларнинг камдан ками самарали бўлади. Ҳис-туйғу интеллекти – жазавага тушиш дегани эмас.

Энг асосийси, сабр-тоқат, босиқлик ўзингизда ва бошқаларда сизга бўлган ҳурмат туйғусини шакллантиради.