Оппоқ,из тушмаган қорга ўхшар у,
Ҳаёга,ғурурга,орга ўхшар у,
Тиригу,яшашга зорга ўхшар у,
Эридан эътибор кўрмаган аёл.

Тунлари тош қўйиб ухлар бошига,
Зайнаб захар қўшар кунда ошига,
Чўмилиб яшайди кўзин ёшига,
Эридан эътибор кўрмаган аёл!

Кутишдан безиллаб бўлган бутунлай,
Ичи дув тўкилган,сирти бутундай,
Кўкка талпинади ёниб,тутундай,
Эридан эътибор кўрмаган аёл.

Ёнида ёрию,ўртада девор,
Қақроқ лабларидан ўпади озор.
Ҳар кеча кетишга қилади қарор,
Эридан эътибор кўрмаган аёл.

Титраб тонг тинглайди нолаларини,
Юмушлар қуритар жолаларини,
Кўзи қиймайдида болаларини,
Эридан эътибор кўрмаган аёл.

Аламлар ўтади жони-жонидан,
Томирлар эрийди қайноқ қонидан,
Куйдирар,яқинроқ ўтманг ёнидан,
Эридан эътибор кўрмаган аёл!

Дардинг бўлишмоққа ахтардим чора,
Заиф табассуминг кўрсайдим зора,
Сенга таскин излар сендек бечора,
Эридан эътибор кўрмаган аёл!

Малика Салимова