Ko'p ishimdan o'zim pushaymon,
O'smir edik, g'o'r edik bizlar.
Men sizlardan uzr so'rayman,
Bilib-bilmay men sevgan qizlar.
-
Biringizda zo'r edi chiroy,
Biringizda sehrgar ko'zlar.
Biri yulduz, biri bo'lsa oy,
Bilib-bilmay men sevgan qizlar.
-
Sevdim desam hazil aralash,
Chippa-chindan ishonibsizlar.
Qilibsizlar meni ko'p talash,
Bilib-bilmay men sevgan qizlar.
-
Bittangizni ranjitdim yomon,
Ko'z yoshingiz qildim dengizlar.
Barchangiz ham dilimda armon,
Bilib-bilmay men sevgan qizlar.
-
Hammangizdan uzr so'rayman,
Bilib-bilmay men sevgan qizlar...