Keng dunyo ko'zinga ko'rinsa tordak
Yulduzlar ko'rinsa uzilmas dordek
Qish kuni yayrasang go'zal bahordek
Demak sen kimnidur sevib qolibsan.

G'azallar yodlasang varaqlab kitob
Uning har satridan porlasa oftob
Nurlari sog'inchdan aylasa hitob
Demak sen kimnidur sevib qolibsan.

Ko'nglingda nish urib boshlasa g'uncha
Hayol surib yotsang tonglar otguncha
Yo'llarga termulsang ko'zing tolguncha
Demak sen kimnidur sevib qolibsan.

Ko'nglingni band etar shirin bir tuyg'u
Tushlaringa kirsa o'ynoqi ohu
Tunlari ko'zingga kelmasa uyqu
Demak sen kimnidur sevib qolibsan...