Бир қарашда бунинг нималигини англаш ҳам қийин. Бу – машҳур Магдебург кўприги. Дунёда машиналар ўтадиган кўприклар саноқсиз, лекин бу кўприк бошқача, у кемалар ўтадиган кўприк.

Эльба дарёси устига қурилган кўприк устидан дарё оқиб ўтади. Германиядаги Магдебург сув кўприги Эльба-Хафель ва Ўрта герман каналларини бир-бири билан боғлайди.

Кўприкни қуриш фикри 1919 йилда пайдо бўлган, лекин уни қуриш 1930 йилда бошланган. Иккинчи жаҳон уруши бошланиши сабабли унинг қурилиши тўхтаган. Қурилиш ишлари 1998 йилдагина қайтадан бошланган. Орадан беш йил ўтгач, қурилиши 130 миллион еврога тушган кўприк фойдаланишга топширилди.

Магдебург кўприги қурилгунига қадар кемалар у каналдан бу каналга ўтиши учун шлюз ёрдамида дарёга тушиши ва кейин нариги каналга кўтарилиши керак эди. Сув кўприги эса каналларни тўғридан-тўғри бирлаштирди.

Кўприк сайёҳлар кўп ташриф буюрадиган жой бўлгани учун унинг атрофида автомобиллар тураргоҳи, велосипед ва пиёда йўлкалари жойлашган. Кўприк қурилиши ҳақида ҳикоя қилувчи музей ҳам мавжуд.